പുതുതായി ആധാര്‍കാര്‍ഡ് എടുക്കാനോ നിലവിലുള്ള കാര്‍ഡ് പുതുക്കാനോ സംസ്ഥാന സഹകരണബാങ്കുകളുടെ പാസ്ബുക്കും വിലാസം തെളിയിക്കാനുള്ള രേഖയായി ഇനിമുതല്‍ സ്വീകരിക്കും. യുണീക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ ( UIDAI ) 2016 ലെ ആധാര്‍ നിയന്ത്രണനിയമത്തില്‍ ഇതുസംബന്ധിച്ച് ഭേദഗതി വരുത്തിയതോടെയാണു സംസ്ഥാനബാങ്കുകളുടെ പാസ്ബുക്കും വിലാസം തെളിയിക്കാനുള്ള രേഖയായി അംഗീകരിക്കപ്പെട്ടത്.
പൊതുമേഖലാബാങ്കുകളും സംസ്ഥാന സഹകരണബാങ്കുകളും നല്‍കുന്ന ഫോട്ടോ പതിച്ച പാസ്ബുക്കുകളും ( ഇവയില്‍ ബാങ്കിന്റെ മുദ്രയും അംഗീകാരവും രേഖപ്പെടുത്തിയിരിക്കണം ) പുതുതായി ആധാര്‍കാര്‍ഡ് എടുക്കുമ്പോഴോ പുതുക്കുമ്പോഴോ വിലാസം തെളിയിക്കാനുള്ള രേഖയായി സ്വീകരിക്കുമെന്നാണു ഭേദഗതിയില്‍ പറയുന്നത്. സാമ്പത്തികസേവനങ്ങള്‍ക്കും മറ്റുമായി കൂടുതലും സഹകരണസ്ഥാപനങ്ങളെ ആശ്രയിക്കുന്ന ഗ്രാമീണ-അര്‍ധനഗര പ്രദേശങ്ങളിലെ ജനങ്ങള്‍ക്ക് ഇതു ഗുണകരമാകുമെന്നാണു കരുതപ്പെടുന്നത്.